بقالي كتير مدخلتش البلوج ...بقالي كتير اصلا متكلمتش عن نفسي كتير..وهو يعني لو اتكلمت عن نفسي هيحصل ايه ..ما انا بقالي 20 سنة بتكلم عن نفسي في حاجة حصلت؟
المؤلم في الموضوع فعلا لما الانسان يفقد القدرة انه يتكلم او يعبر.... احساس كريه جدا.....هو في حالة عامة من القرف كده والاشمئزاز عامة مش فاكرة بدأ امتى بالظبط ومش حابة اتكلم كتير عن الحالة دي ....مش حابة احس اني زي كل الناس الي بقابلهم من ساعة ما بصحى لحد ما انام ...قول لحد صباح الخير وهيعتبر ده حقه الطبيعي انه يقلب دماغك بكل احزانه بداية بوجع القاولون انتهاء بقصه حبه الفاشلة و انه مفلس..والمهم في الموضوع انك مش مهتم اصلا بكل كلامه ومش متابعه لكن سرحان في ياترى معاك فلوس قد ايه النهارده...
هو السؤال اللي بيطرح نفسه مبدئيا ياترى 2007 هتبقى ازاي ....بغض النظر انها بدأت معايا بداية تعيسة....(لما حد يصحى من النوم على منظر انسان بيتشنق وبعدين كمان يعرف انه صدام حسين وعلي يد ميننننن) انا مقربش لصدام ومكنش لي معاه علاقة شخصية او كنت بنام وبحلم بيه بينادي اسمي من بعيد كل اللي فاكراه عنه اني كنت بنت صغيرة جدا مع بابا وماما في السعوديه وماما كانت خايفة لحسن يدخل السعودية ويموتنا وكانت بتدور على حاجة ضد الغازات السامة في حالة انه استخدمها ومن هنا اظن انها مش ذكريات سعيده جدا بالنسبة لعلاقتي بصدام حسين...لكن الاهانة ان انسان بيموت وبيتشتم..... انسان بيموت على الملا...انسان بيموت بعد مسرحية طويلة كده ملهاش ملامح....بلاش دي...انسان بيموت وانا لسه صاحية في اول يوم من السنة
وتيجي تتكلم وتعمل نفسك سياسي عظيم وتلاقي حد يقولك مهو صدام يستاهل وبعدين مهما الحاكم كان ظالم مكانش يعمل الي عمله بصراحة يعني احنا الراجل هنا موصلش للدرجة بتاعته...معرفش ليه ساعتها بفتكر ان اللي بيقتل انسان كأنه قتل البشر كلهم وبالتاي الي بيظلم فرد بيظلم الناس كلهم و الي في عهده سمعت عن واحد البوليس ظبطه والبنات بيتبهدلوا في وسط البلد والامن المركزي واقف يتفرج ...صحيييييح مهي مكنتش مظاهرة ...معرفش ساعتها محستش ان صدام مكنش يستاهل قوي انه يتعدم وانا اتفرج عليه اول يوم في السنه الصبح....ده باعتبار ان الانسان عايش في عصر الحب والديمقراطية وعلى راي الاغنية اللحمة ب 7 جنيه وساعات ب 6
هو احنا ليه ملناش قيمه للدرجة دي بجد احساس شنيع صحيح هو بقاله كتير جدااا وموجود من زمان جدا يعني من ايام دنقل لما قال
كيف تنظر في عيني امرأة .. أنت تعرف أنك لا تستطيع حمايتها ؟
الله يرحمك يا دنقل بقى لو كنت عايش كان زمانك مت تاني
انا زهقت من الكلام مش كنت قلت مش عاوزه اتكلم اصلا..... سلاااااااااام
